ما هي الميتافيزيقا؟ الروح الخفية و تأثيرها علينا !

مافيش أي حد سأل ما هي الميتافيزيقيا و علاقتها بالعقل الباطن ، ده خلاني طبعًا اهتم بالموضوع و اكتب عنه
" أرسطو ، الله ، و شرط اليقين "
مبدئيًا حقك تعترض على كلامي و تصحح أخطاء إن وجدت (المدققون اللغويون يمتنعون)
أولًا أرسطو ذكر مصطلح (ميتافيزيقيا) للتعبير عن القوة الخفية اللي بتحرك كل حاجة في الكون ، كبيرها و صغيرها ، كل تفصيلة ، النظام المُحكم اللي بييظبط كل حاجة و اللي بيسمح في أجزاءه بالعشوائية (عشوائية منظمة)
ثانيًا: الزمن - منطقيًا - هو الإطار الخفي اللي بيحصل فيه كل حاجة ، لو الزمن مشي = كل حاجة ماشية ، لو وقف = كل حاجة وقفت ، لو راح ؟؟ = كل حاجة راحت ! ، في الحقيقة انا بقول إن الزمن هو هو الميتافيزيقيا ، الاتنين مصطلحين بيعبروا عن نفس المعنى ، الخفاء و التحريك
ثالثًا: في حديث بيقول "لا تسبوا الدهر فالله هو الدهر" يعني الإله - بشكل أو بآخر - هو البيئية الميتافيزيقيا للكون هو بيتجسد فيها و ده اللي بيمنحه سمة القدرة اللامتناهية و السيطرة التامة على كل شيء مهما بلغ من الدقة ، و ده بيدعم نظرية (التطور الموجه ذو الغاية في عملية الخلق لعبد الصبور شهين): إن الخلق تم بالفعل بآلية التطور بس مش عن طريق طفرات عشوائية بالصدفة ، لكن عن طريق توجيه إلاهي لا متناهي الدقة ، " و هو الله في السماوات و الأرض" ، "و في أنفسهم أفلا يبصرون" ، اسمه (الظاهر) في كل مرأي و ملموس بشر طبيعة جبال ، اسمه الباطن في الأرواح و الوجدان و الأنفس و الميتافيزيقيا (الزمن) و الموجات الخفية اللي منها الراديو و خلافه
رابعًا: كتاب قوة عقلك الباطن فرد صفحات كتيرة جدًا عشان عايز يقول كلمتين " خلي عندك يقين في اللي بتتمناه هيتحقق" ، ده هيخلينا نروح لعلاقة الميتافيزيقيا بالعقل الباطن ، و شرط اليقين

اكيد سمعت حد من الشيوخ بيقول إن اليقين شرط من شروط الاستجابة للدعاء ، الإمام في الجُمعة بيقول" ادعوا الله و أنتم متيقنون بالإجابة" ، طب نتيقن ليه ؟؟ مش هو قادر على كل شيء سواء تيقنا أو لأ ؟ ، هو ببساطة حسب علم الطاقة ( لسا ما تبحرتش فيه كفاية ) و كتاب قوة العقل الباطن ، انت بتطلع طاقة خفية منبعثة عن باطنك بتأثر في البيئة الخفية (الميتافيزيقيا) بشكل يسير الأمور على النحو اللي انت شايفه ، و كل ما كان يقينك أقوى و إيمانك و روحك أمتن كل ما كان قدرتك على التأثير أكبر بالتالي يُستجاب دعائك و يتحقق اللي انت عايزه ، ده يفسرلنا ظاهرة الأولياء الصالحين اللي كان دعائهم مستجاب و يعبرلنا عن وجدانهم الخارق و تأثيرهم الغير عادي على البيئة الخفية المحركة للكون ، و ياخدنا لسكة متشعبة في الباراسيكولوجي و القدرات الخاصة من مشي على المياه و طيران و تواصل عن بُعد..إلخ ، السحر علم ، السحر موجود ، السحر مش بس جن و شياطين و دجالين ، زي ما يحيى الفخراني قال كدة في (ونوس) ، و قال إن في ناس بتعرف و دول قليلين ، و في ناس مش بتعرف و دول كتار و نصابين ، الخلاصة إن ربنا حط شرط اليقين علشان يتماشى مع البيئة الميتافيزيقية اللي هو هيئها ، مش عطى الأمر و خلاص !

أنا بفترض إن كياننا الخفي (الوجدان) زيه زي كياننا المادي (الجسد) ، انت بتروح الجيم و تاخد مكملات في خلال فترة معينة بتبقى فورما و عملاق ، نفس الحكاية إنك بتمرن قواك الباطنة و تمتنها عن طريق أساليب معينة زي الويجا و الاستعانة بالجانب الديني أيًا كانت ملتك علشان تكتسب قدرات روحانية خاصة زي الإسقاط النجمي و السير على المياه و الطيران..إلخ ، لا مش مصطبح والله ، على فكرة لو كنت روحت لحد في القرون الوسطى أثناء طوافه الكعبة و قولتله إن في موجات في الجو اسمها الراديو تقدر تسمعني من خلالها عن طريق جهاز و انا بكلمك من يثرب كان هيسلط عليك إبل مكة كلها تبول عليك ، فمن فضلك ماتتهمنيش بالجنون
انا بفترض إن البيئة المادية ( فيزيا ، كيميا ، أحياء) زيها زي البيئة الخفية ، لما بنهاجمها بتحط علينا ، فزي ما الطبيعة المرئية فشختنا كوارث بسب سلوك مادي عدواني (تلوث و كيماويات) ، فالبيئة الخفية (الميتافيزيقيا) اتخذت ضد الإنسان سلوكيات غاية في القسوة بسبب الشطط السلوكي (الدموية و اللواط و التكبر على الذات الإلاهية) ، الميتافيزيقيا سلطت الجراد و القمل و التماسيح و خسفت الأرض و أرسلت الطوفان و الرياح الثرثر ، كل ده كان عصف ذهني خلاني اعمل بوست هزلي اتكلم فيه عن الكائن الفضائي و غاز الـBo4 امبارح ، بس حقيقي انا عايش في Mind fuck بقالي كام أسبوع و بحاول امسك في أي حاجة لإني حاسس بنقص طول ما الصورة مش كاملة
الفرضية اللي عايز اقولها: إن الميتافيزيقيا بتعلن رفضها للسلوك البشري في الآونة الأخيرة متمثل في الاكتئاب و ارتفاع حالات الانتحار و فقدان الشغف عن الناس.